19.08.2010

Punëtori, Rindërtimi i Informatave Kadastrale për Komunën e Prizrenit

Agjencia Kadastrale e Kosovës fillon projektin e Rindërtimit të Informatave Kadastrale për dy zona kadastrale të Komunës së Prizrenit, respektivisht zonën kadastrale Prizren dhe zonën kadastrale Vlashnje. Kompania zbatuese e këtij projekti është kompania turke Emi-Harita. Përfaqësuesit e kësaj kompanie me datë 19.08.2010 në ambientet e AKK-së realizuan një punëtori lidhur me metodologjinë e tyre të punës. Prezantimin e detajuar  të metodologjisë së punës e bëri drejtori i përgjithshëm i kësaj ndërmarrjeje,  Dr. Ömür Demirkol. Pjesëmarrës aktiv në punëtorinë ishin edhe ekspert nga fusha të ndryshme brenda  AKK-së, në mesin e të cilëve edhe Kryeshefi i AKK-se, Prof. Dr. Murat Meha. Qëllimi i shkëmbimit të përvojave mes ekspertëve Kosovarë dhe Turq është në favor të zbatimit sa më të mirë të projektit për rindërtimin e informatave kadastrale për dy zonat e sipërpërmendura kadastrale të Komunës së Prizrenit.

09.07.2010

Nënshkrimi i Kontratës për Avancimin e Rexhistrit të Pronës

Në Agjencinë  Kadastrale të Kosovës Kryeshefi Ekzekutiv Prof Dr. Murat Meha së bashku me disa udhëheqës të drejtoratëve mbajtën  një takim me donatorët nga Qeveria Norvegjeze si dhe me menaxherin e kompanisë Blom Info nënshkrues i kontratës për zbatim.
Qëllimi i këtij takimi ishte përgatitja dhe nënshkrimi  i kontratës për zhvillimin e mëtejmë të softuerit RDPP – SIKTK.
Qeveria Norvegjeze u tregua e gatshme dhe do të bëjë financimin e këtij projekti duke përfshirë fazën përfundimtare të tij.
Ndërsa  menaxheri i kompanisë Blom Info njoftoi Prof. Dr. Meha për hapat e ardhshëm të zhvillimit të softuerit.
Dhe në fund të diskutimeve dhe analizave tre ditore u arrit marrëveshja për zhvillimin e mëtejmë të softuerit dhe u nënshkrua kontrata me kompaninë Blom Info.
Nënshkrues të kësaj kontrate janë: Statens Kartverk, Agjencia Kadastrale e Kosovës  dhe Blom Info.

09.07.2010

Takim me Drejtorët e Drejtoratëve (zyrave) Kadastrale Komunale të Kosovës

Agjencia Kadastrale e Kosovës me datë 07.07.2010 mbajti takimin rregullt me drejtorët e drejtorive (zyrave) Kadastrale Komunale të Kosovës.
Kryeshefi Ekzekutiv i Agjencisë Kadastrale të Kosovës Prof. Dr. Murat Meha në fjalën hyrëse përshëndeti të pranishmit dhe njëkohësisht informoi për aktivitetet e AKK-së gjatë kësaj periudhe.
Ai shtoi se AKK me kapacitet e veta është angazhuar që t’i filloj disa projekte të reja , t’i vazhdoj projektet që kanë qenë në vazhdim e sipër,të bëjë përkrahjen e të gjitha komunave me trajnime të ndryshme sipas kërkesave të tyre dhe të ofroj ndihmë profesionale në të gjitha lëmit që ofron kadastri si : në modelin kadastral, në përkrahje të RDPP-së, në përkrahje të trajnimeve me Gjeomedia Profesional, me matje kadastrale etj.
U diskutua edhe për përmirsimin e mëtejm të  komunikimit në mes Agjencisë Kadastrale të Kosovës dhe Zyrave Kadastrale Komunale, lidhjet në rrejtin e TI (Teknologjia Informative), ngritjen e nivelit cilësor dhe efikas të shërbimeve kadastrale, mirëmbajtja e kadastrit, mirëmbajtja e regjistrit, eleminimi i të metave etj.
Në takim drejtorët kërkuan që AKK –ja  të ndihmoj procesin e ngritjes së kompenzimit  të punëtorëve të ZKK-ve. Prandaj u mor vendim që kryetarëve të komunave të u rekomandohet një gjë e tillë nga AKK.
Me këtë rast, pasi që AKK-ja ka pranuar një donacion nga GTZ-ja Gjermane  për disa paisje Gjeodezike siç janë disa GPS të dorës, andaj gjatë këtij takimi Kryeshefi Ekzekutiv i AKK-së bëri shpërndarjen e këtyre GPS për disa komuna.  
Në fund të takimit drejtorët e drejtorive përshëndetën Kryeshefin Ekzekutiv, dhe e falenderuan për organizimin e takimeve të rregullta me drejtorët e drejtorive si dhe për përkrahjen e vazhdueshme që po jep AKK-ja për komunat, si në trajnime të ndryshme ashtu edhe në shumë fusha tjera kadastrale.

05.07.2010

Inaugurimi i Zyrës Kadastrale Komunale në Prizren

Në lokalet e Kuvendit Komunal të Prizrenit me datë 02.07.2010  u bë inaugurimi i zyrës kadastrale komunale të Prizrenit.
Agjencia Kadastrale e Kosovës është implementuese  për Pilot Projektin për Riingjinerim të ZKK-ve (Zyrave Kadastrale Komunale) të financuar nga Banka Botërore, prej të cilit përfituese ka qenë edhe Zyra Kadastrale Komunale e Prizrenit.
Projekti përmbante me vete :
- Hartimin e planit zbatues përkatësisht koncepti i zyrës pritëse dhe përcjellëse,
- Instalimin e sistemit të ventilimit dhe klimatizimit,
- Instalimin e sistemit për mbrojtje nga zjarri,
- Pajisje me inventar dhe pajisje të TI-së: pas vlerësimit të nevojave është bërë pajisja e ZKK-së me inventar (interieri i zyrave) si dhe me pajisje të TI-së e cila e ka përmirësuar ambientin e punës duke krijuar kushte optimale për punë efektive.
Inaugurimin e Zyrës Kadastrale të Prizrenit e përshëndetën : Kryetari  i Komunës së Prizrenit  z. Ramadan Muja, Kryeshefi Ekzekutiv i Agjencisë Kadastrale të Kosovës z. Murat Meha , përfaqësuesi nga Ministria e Mjedisit dhe Planifikimit Hapësinor z. Adnan Yagcilar dhe nga Banka Botërore z. Xhavit Buzhala.
Po ashtu të pranishëm në këtë eveniment  ishin edhe zyrtarë nga Agjencia Kadastrale e Kosovës dhe  përfaqësues nga Kuvendi Komunal i Prizrenit.

30.06.2010

Implementimi i projektit për krijimin e Hartave Topografike të territorit të Kosovës  përmes bashkëpunimit teknik me JICA

Në  Agjencinë Kadastrale të Kosovës  Kryeshefi Ekzekutiv z. Murat Meha priti në një takim pune përfaqësuesin nga Qeveria Japoneze z. Kaoru Tsuda.
Qëllimi i këtij takimi ishte hapja e mundësive për fillimin e projektit të hartave topografike të shkallës 1:25000 për territorin e Kosovës.
Hartat topografike të cilat gjinden në AKK janë të vjetruara dhe i përkasin periudhës 1975 – 1980.
Ky projekt i cili mund të financohet nga Qeveria Japoneze është mjaft i rëndësishëm  për zhvillimin ekonomik të vendit, po ashtu ka një rëndësi të veçantë edhe për orientim, për planifikim etj.
Kryeshefi Ekzekutiv z. Murat Meha e informoi z. Tsuda për situatën aktuale që e kemi në AKK me një hyrje të përgjithshme rreth asaj se çfarë të dhënash posedon  Agjencia Kadastrale e Kosovës të cilat do të shërbejnë si bazë për përpilimin e hartave topografike.
Në këtë  takim z. Kaoru Tsuda shprehi mundësit e mbështetjes së Qeverisë së Japonisë që do t’i jepet Agjencisë Kadastrale të Kosovës rreth këtij projekti.

18.06.2010

     Takim i përbashkët në mes  AKK-së dhe ALUIZNI-it

Të premten me 18 qershor në Kukës u mbajt takimi midis Agjencisë Kadstrale  të Kosovës dhe Agjencisë së Legalizimit, Urbanizimit dhe Integrimit të Zonave / Ndërtimeve Informale (ALUIZNI-t) nga Shqipëria.
Në këtë takim përveç përfaqësuesve të AKK-së dhe ALUIZNI-t morën pjesë edhe përfaqësues nga Universiteti Politeknik i Tiranës, Zyra Qëndrore për Regjistrimin e Pasurive në Shqipëri, Ministria e Mjedisit dhe Planifikimit Hapësinor të Kosovës, Drejtoria për Kadastër KK Prishtinë si dhe konsulentja nga Banka Botërore znj. Marianna Posfai.
Në këtë takim u prezantuan disa punime si: Zhvillimi i Kadastrit  në Republikën e Kosovës nga Kryeshefi Ekzekutiv i AKK-së z. Murat Meha, Ndërtimet Informale  dhe  Impaktet  e saj nga Prof. Dr. Shaban Memia, Sistemi Gjeodezik  Shtetëror  Satelitor në Republikën e Shqipërisë nga Universiteti Politeknik i Tiranës, Funksionimi i Regjistrit të të drejtave mbi Pronën e Paluajtshme në Kosovë nga z.Hajzer Bublaku AKK, Sistemi i Regjistrimit  të Pasurive të Paluajtshme  në Shqipëri nga z.Arben Qirjako,Sistemi i Planifikimit Hapësinor në Kosovë nga znj.Vjollca Puka dhe Procedurat e Ndërtimit në Kosovë nga znj.Shpresa Strellci.
Gjatë këtij takimi u nënshkrua edhe një memorandum bashkëpunimi në mes Agjencisë Kadastrale të Kosovës  dhe Agjencisë së Legalizimit, Urbanizimit dhe Integrimit të Zonave / Ndërtimeve Informale (ALUIZNI).
Ky memorandum bashkëpunimi u nënshkrua nga Kryeshefi Ekzekutiv i Agjencisë Kadastrale të Kosovës z. Murat Meha dhe nga Drejtori i Përgjithshëmi i ALUIZNI-t  z. Shaban Memia.
Qëllimi i këtij memorandumi është formalizimi e bashkëpunimi  reciprok afatgjatë si dhe unifikimi e standarizmi i informacioneve  në fushat që këto institucione aplikojnë.

12.06.2010

Konferenca e tretë regjionale për Kadastrin

Në Beçiç të Malit të Zi, nga 09-11 Qershor 2010 u mbajt konferenca e tretë regjionale për Kadastrin dhe Administrimin e tokës. Takimi ka për qëllim bashkëpunimin e ndërsjellë në fushën e Kadastrit dhe Administrimit të tokës të të gjitha Agjencive shtetërore për Kadastër në nivel të regjionit. Në këtë konferencë përveç prezantimit të të arriturave dhe shkëmbimit të eksperiencës midis Agjencive të Kadastrit në rajon u diskutua mundësia e nënshkrimit të marrëveshjes për bashkëpunim midis të gjitha këtyre Agjencive. Në Konferencë morën pjesë përfaqësues nga Bosnja dhe Hercegovina, Kosova, Kroacia, Mali i Zi, Maqedonia, Serbia dhe Sllovenia, kurse nga viti i ardhshëm anëtarë do të jetë edhe Shqipëria.
Delegacioni nga Kosova përveç prezantimit të të arriturave në AKK pati rastin të ketë shumë takime pune me përfaqësues të ndryshëm të vendeve në rajon për të diskutuar problemet e përbashkëta që e preokupojnë zhvillimin e Kadastrit. Kthimi i dokumentacionit Kadastral nga Serbia ishte gjithashtu çështje që u ngrit nga AKK-ja gjatë punimeve të kësaj Konference.
Me një konstatim të përbashkët të të gjithëve për organizim të shkëlqyer të kësaj Konference nga Autoriteti për Gjeodezi dhe Kadastër i Malit të Zi, Konferenca mbylli punimet e saj, ku u vendos që vitin e ardhshëm ajo të mbahet në Slloveni.

15.06.2010

  Vizitë pune e Ministrit të Mjedisit dhe Planifikimit Hapësinor (MMPH)
    në Agjencinë Kadastrale të Kosovës

Ministri i Mjedisit dhe Planifikimit Hapësinor z. Mahir Yagcilar së bashku me bashkëpunëtorët e tij, ishte në një vizitë pune në Agjencinë Kadastrale të Kosovës për tu njoftuar për së afërmi me punën, zhvillimet  dhe të arriturat deri më tani.
Ministri Yagcilar u prit nga Kryeshefi Ekzekutiv z. Murat Meha i cili e informoi në lidhje me punën, aktivitetet dhe organizmin e Agjencisë Kadastrale të Kosovës pas kalimit të saj në Ministrinë e Mjedisit dhe Planifikimit Hapësinor.
Ministri Yagcilar shtoi  që Agjencia Kadastrale e Kosovës do të ketë mbështetjen dhe përkrahjen e Ministrisë së Mjedisit dhe Planifikimit Hapësinor duke mos iu cenuar pavarësia e saj si institucion. Ai tha që brenda MMPH-së ekziston  Agjencia për Mbrojtën e Mjedisit dhe Agjencia Kadastrale e Kosovës, ndërsa në të ardhmen do të jetë pjesë e ministrisë edhe Agjencia për Rrezatim dhe për Siguri Nukleare, të gjitha këto institucione do të vazhdojnë të punojnë si institucione të pavarura.
Përgjatë takimit u diskutua në lidhje me harmonizimin e veprimeve për çështje të ndryshme.
Kryeshefi Ekzekutiv z.Meha në fund të takimit falënderoi Ministrin Yagcilar për vizitën dhe përkrahjen dhënë AKK-së.

07.06.2010

Dhjetë vjetori i themelimit të Agjencisë Kadastrale të Kosovës

Agjencia Kadastrale e Kosovës sot shënoi dhjetë vjetorin e themelimit te saj. Në shënimin e këtij dhjetë vjetori për pos zyrtarëve të AKK-së, morën pjesë edhe Ministri i Mjedisit dhe Planifikimit Hapësinor z. Mahir Yagcilar dhe konsulentja nga Banka Botërore znj. Marianna Posfai.
Kryeshefi Ekzekutiv i Agjencisë Kadastrale të Kosovës z. Murat Meha përshëndeti të pranishmit dhe veçanërisht Ministrin Yagcilar. Ai prezantoi punën, aktivitetet dhe të arriturat e Agjencisë Kadastrale të Kosovës gjatë këtyre dhjetë viteve.
Z. Meha shtoi se kjo datë është mjaft e veçantë, pasi që është datë jubilare e punëve, aktiviteteve të arriturave dhe zhvillimit të vizioneve për të ardhmen, por njëkohësisht edhe qartësimin e raporteve pronësore që populli i Kosovës  pret që të jetë sa më mirë e qartësuar. Po ashtu  z. Meha  informoi stafin  se Agjencia Kadastrale e Kosovës nga sot është pjesë e Ministrisë së Mjedisit dhe Planifikimit Hapësinor.
Ministri Yagcilar i uroi  të gjithëve dhjetë vjetorin e themelimit të AKK-së dhe shtoi se Ministria e Planifikimit Hapësinor do të mbështesë dhe përkrahë AKK-në si institucion të pavarur në zhvillimet dhe në modernizimin e kadastrës.
Z. Yagcilar shtoi se kadastri  dhe çështjet pronësore janë çështje mjaft të rëndësishme për çdo shtet  prandaj sa më shumë të jemi efikas dhe sa më shumë të jemi afër kërkesave të qytetarëve atëherë në këtë mënyrë shteti do të jetë më funksional.
Dhe në fund u organizua  një koktej rasti për nderë të dhjetë vjetorit të themelimit të Agjencisë Kadastrale të Kosovës.

04.06.2010

Takim me Kompanitë e Licencuara Gjeodete

Kryeshefi Ekzekutiv i Agjencisë Kadastrale të Kosovës z. Murat Meha priti në një takim njoftues Kompanitë e Licencuara Private në fushën e kadastrës dhe gjeodezisë.
z.Meha falënderoi pjesëmarrësit për ardhjen e tyre dhe i informoi për zhvillimet dhe aktivitetet e AKK-së.
Kryeshefi Ekzekutiv shtoi se Agjencia Kadastrale e Kosovës është një institucion i hapur me të gjitha  institucionet ashtu sikur edhe  me sektorin privat dhe se raportet e mira dhe bashkëpunimi i ndërsjellë me këtë sektor siguron arritjen e rezultateve  më të mira.
Në këtë takim u pranuan  sugjerimet dhe kërkesat e pjesëmarrësve për çështje të caktuara.

28.05.2010                                        
                 Vizita e Kryetarit të Kuvendit Komunal të Drenasit

Kryetari i Kuvendit Komunal të Drenasit  z. Nexhat  Demaku  së bashku me Drejtorin e Kadastrit  z. Mehdi Kurumeli  dhe me ekspertin për gjeodezi z. Fadil Shehu  vizituan Agjencinë Kadastrale të Kosovës.
Qëllimi i këtij takimi ishte shikimi i mundësive për mbështetje teknike dhe profesionale të kadastrit të Drenasit por edhe të fushave të tjera të ndërlidhura me kadastër.
Z. Demaku kërkoi nga Agjencia Kadastrale e Kosovës që të ketë një mbështetje profesionale posaçërisht  në Teknologjinë Informative si dhe të forcohen mardhënjet e bashkëpunimit midis këtyre dy institucioneve.
Kryeshefi Ekzekutiv z. Murat Meha falënderoi të pranishmit për vizitën e tyre  dhe kërkoi që kërkesat e tyre t’i dorëzojnë me shkrim  dhe më pas do të shikohen  mundësitë për t’i zgjidhur ato.

27.05.2010

Përfaqësuesit e ALUIZNI -it (Agjencia e Legalizimit, Urbanizimit dhe Integrimit të Zonave/ Ndërtimeve Informale) në krye me Prof. Dr. Shaban Memia, z. Behar Zeneli drejtor i përgjithshëm, z. Kristaq Qirko  drejtor në sektorin e Hartografisë dhe Teknologjisë Informative dhe z.Agim Berisha drejtor i urbanizimit të KK të Tiranës, u pritën nga Kryeshefi Ekzekutiv z. Murat Meha dhe drejtorët e drejtoratëve  të Agjencisë Kadastrale të Kosovës.
Kryeshefi  Ekzekutiv z. Meha  falënderoi  mysafirët për vizitën e tyre në Agjencinë Kadastrale të Kosovës  dhe  shtoi se këto vizita janë mjaft frytëdhënse pasi që  shkëmbimi i informacioneve dhe vizitat e ndërsjella e ndihmojnë zhvillimin e proceseve të regjistrimit të pronës si në Shqipëri ashtu edhe në Kosovë.
Z. Meha përgjatë takimit paraqiti shkurtimisht  rrjedhën e punës së Agjencisë Kadasrale të Kosovës  që nga themelimi deri më sot.
Prof.  Memia në emër të delegacionit falënderoi Agjencinë Kadastrale të Kosovës për mikpritjen dhe beri një prezantim të shkurtër për punën dhe qëllimet e kësaj agjencie dhe për pos kësaj  shtoi se bashkëpunimi mes këtyre dy vendeve është mjaft i rëndësishëm për unifikimin e teknologjisë, standardeve si dhe krijimi i lehtësimeve në të gjitha këndvështrimet.
Këtij  takimi iu bashkëngjit edhe Kryetari i Kuvendit Komunal të Prishtinës Prof. Isa Mustafa, i cili në veçanti theksoi nevojën e këmbimit të përvojave të mira  si dhe mbështetjen reciproke te dy vendeve ne veçanti në fushën e kadastrës.
Gjatë vizitës dy ditore ky delegacion vizitoi Fakultetin e Ndërtimtarisë (Drejtimi i Gjeodezisë), Sektorin Privat, Kuvendin Komunal të Prishtinës përkatësisht Drejtorinë e Kadastrit  dhe në fund vizituan edhe Ministrinë e Administratës Publike ku u pritën nga Ministrja Znj. Edita Tahiri.

27.05.2010     

Vazhdon bashkëpunimi i Agjencisë  Kadastrale të Kosovës me ndërmarrjet publike

Në kuadër të angazhimeve  të vazhdueshme Kryeshefi Ekzekutiv i Agjencisë Kadastrale të Kosovës  z. Murat  Meha  priti në një takim pune  z. Ferat Shala  Drejtor Gjeneral i ndërmarrjes “Trepça “, ndërmarrje kjo e cila është në administrim të AKP-së ( Agjencia Kosovare e Privatizimit ).
Qëllimi i kësaj vizite ishte  bashkëpunimi dhe harmonizimi i informacioneve dhe të dhënave nga Agjencia  Kadastral e Kosovës,  për pronat dhe asetet e Trepçës, për zonat me interes mineral mbajtës që kanë qenë të hulumtuara  nga  Trepça në të kaluarën.
z. Shala shtoi se është në interes të përbashkët edhe bashkëpunimi i ndërsjellët  me nivelet  e zyrës së GIS-it dhe TI (Teknologjia Informative) pra harmonizimi i të gjitha shënimeve  kadastrale dhe verifikimi i tyre të cilat i ka Trepça në dispozicion dhe që janë të ndërlidhura me pronën dhe kadastrën. Kryeshefi Ekzekutiv z.Meha tha që të dhënat në  AKK  janë të dhëna publike ato duhet t’i shërbejnë edhe ekonomisë edhe pronarit, d.m.th secilit person fizik apo juridik që është i interesuar të ketë të dhëna për pronat e ndryshme në Kosovë.
Z. Meha shtoi se pa të dhëna kadastrale dhe pa statut të qëndrueshëm të të

21.05.2010

                             Trajnimi në GeoMedia Profesional 5.2  

Në kuadër  të objektivit  për ngritjen e kapaciteteve në zhvillimin dhe avancimin e punëve, në Agjencinë Kadastrale të Kosovës është mbajtur një trajnim bazik 2 (dy) javor në softuerin GeoMedia Profesional 5.2, softuer i cili është në përdorim pranë AKK-së dhe ZKK-ve (Zyrave Kadastrale Komunale).
Pjesëmarrës në këtë trajnim ishin këto komuna : Peja, Vitia, Shtime dhe Fushë Kosova dhe me këtë rast në bazë të nenit 3.7 të udhëzimit administrativ nr. MSHP 2004/3, kandidatët pjesëmarrës u pajisen me certifikata.

19.05.2010

Kryeshefi Ekzekutiv i Agjencisë Kadastrale të Kosovës  priti profesorët Universitar  nga Suedia

Kryeshefi Ekzekutiv z. Murat Meha së bashku me z. Muzafer Çakën, udhëheqës i zyrës koordinuese të projekteve dhe znj. Luljeta Vuthin, shefe e sektorit të administratës, pritën delegacionin nga Instituti Mbretëror për Teknologji nga Stokholmi. Delegacioni suedez udhëhiqej nga prof. Hans Mattsson, udhëheqës i departamentit për GIS dhe Gjeoinformacion dhe prof. Marina Vaskovich, drejtoreshë e programit Master për Menaxhimin e Tokës. Në përbërje të delegacionit suedez ishin edhe prof. Olga Petrakovska nga Fakulteti i Ndërtimtarisë dhe Arkitekturës -Universiteti shtetëror i Kievit (Ukrainë) dhe  znj. Nadezda Kamynina  nga Fakulteti i Gjeodezisë dhe Hartografisë - Universiteti shtetëror i Moskës.
Kryeshefi Ekzekutiv z. Meha bëri një prezantim të Agjencisë Kadastrale të Kosovës dhe i njoftoi të pranishmit lidhur me rëndësinë, organizimin, punën dhe aktivitetet e AKK-së. Më pas delegacioni bëri një vizitë në drejtoratet e AKK-së dhe me këtë rast punëtorët e drejtoratit të kadastrit, teknologjisë informative, GIS-it dhe sektorit të marketingut bënë një prezantim të punëve të cilat zhvillohen nga këto drejtorate.
Po ashtu ky delegacion vizitoi edhe Fakultetin e Ndërtimtarisë dhe Arkitekturës – dega e Gjeodezisë të Universitetit të Prishtinës. Ata u pritën nga profesorët Ilmi Zherka dhe Përparim Ameti nga të cilët u informuan lidhur me të arriturat dhe nevojat e fakultetit të gjeodezisë. Në përmbyllje të vizitës ky delegacion u takua me 10-të nga 11-të ish studentët kosovar të cilët studiuan në programin Master për Menaxhimin e Tokës në Institutin Mbretëror për Teknologji në Stokholm të Suedisë (programi LM), program ky i financuar nga qeveria suedeze - SIDA.

18.05.2010

Bashkëpunimi mes AKK-së  dhe Policisë së Kosovës  

Kryeshefi Ekzekutiv z. Murat Meha  priti në një takim  drejtorin e përgjithshëm të Policisë së Kosovës Gjeneral Behar Selimi  dhe  Major Agron Rukiqi.
Përgjatë takimit u bisedua se si të gjinden format e bashkëpunimit, të bëhet shkëmbimi i informacioneve dhe të dhënave  të cilat janë në Agjencinë Kadastrale të Kosovës për Policinë e Kosovës pasi që  mbrojta dhe ruajtja e vendit bëhet nëse është bashkëpunimi i mirë ndër institucional.
Po ashtu Gjeneral Selimi uroi Kryeshefin Ekzekutiv z. Meha për detyrën e re në Agjencinë Kadastrale të Kosovës.

13.05.2010

Pjesëmarrja e Agjencisë Kadastrale të Kosovës në simpoziumin e parë ndërkombëtarë për menaxhimin e tokës

Në vazhdën e aktiviteteve  Kryeshefi Ekzekutiv i Agjencisë Kadastrale të Kosovës z. Murat Meha ishte pjesëmarrës në simpoziumin e parë  ndërkombëtarë  për menaxhimin e tokës, e cila është mbajtur me datë 10-11 Maj 2010 në Hannover të Gjermanisë.
Në këtë simpozium të cilën e organizoi GTZ (Organizata Gjermane për Bashkëpunim Teknik) moren pjesë rreth 150 ekspertë të kësaj lëmie nga Gjermania dhe nga shtete të tjera të evropës.
Përveç pjesëmarrjes së tij z. Meha në këtë simpozium prezantoi  punimin  me temën “Komasacioni i Tokës Brenda Strategjisë për Zhvillim të Qëndrueshëm Ekonomik të Kosovës”.

12.05.2010

Vizitë në Agjencinë Kadastrale të Kosovës nga përfaqësuesit e Bankës Botërore

Në Agjencinë Kadastrale të Kosovës në një vizitë pune ishin përfaqësuesit e Bankës Botërore z. Cora Melania Shaw dhe z. Afrim Frrokaj.
Qëllimi i këtij takimi ishte analiza dhe diskutimi në lidhje me realizimin e projekteve të mbështetura nga Banka Botërore.

05.05.2010

Bashkëpunimi në mes Agjencisë Kadastrale të Kosovës  me Zyrat Komunale Kadastrale

Në kuadër të aktiviteteve të vazhdueshme Agjencia Kadastrale e Kosovës mbajti takimin e radhës   me drejtorët e Zyreve Kadastrale Komunale të Kosovës ku dhe u dakordua që ky takim të mbahet  çdo muaj me qëllim të përmirësimit të  bashkëpunimit të ndërsjellët.
U.d  Kryeshefi Ekzekutiv z.Murat Meha  në fjalën hyrëse përshëndeti pjesëmarrësit dhe i njoftoi drejtorët për qëllimin e këtij takimi.
Sipas z. Meha qëllimi i këtij takimi ishte  diskutimi i disa qështjeve që janë të rëndësishme për zhvillimin e kadastrit dhe njëkohësisht cilat do të jenë hapat që duhet të ndërmiren së bashku, që Agjencia Kadastrale e Kosovës dhe njëkohësisht Zyrat Kadastrale Komunale (ZKK) të jenë të gatshme për bashkëpunim, pastaj  përcaktimi i detyrave dhe aktiviteteve për  të ardhmen dhe që ta shohim suksesin mbrenda një periudhe të caktuar kohore pasi që administrimi i tokave, menaxhimi i saj dhe regjistrimi i të drejtave mbi pronën e pa luajtshme është njëra ndër kërkesat kryesore të qytetarëve të Kosovës.
Kryeshefi Ekzekutiv përveç tjerash kërkoi nga drejtorët e zyreve kadastrale komunale që të ketë një bashkëpunim të ngushtë me Agjencinë Kadastrale të Kosovës pasi që AKK është autoriteti më i lartë për gjeodezi kadastër dhe hartografi në Kosovë.
Në këtë takim u prezentua një përmbledhje e shkurtër në lidhje me  problematikën  rreth azhurnimit të të dhënave grafike digjitale  dhe regjistrimet në RDPP dhe vendosja sipas kërkesave.
Përgjatë takimit pjesëmarrësit parashtruan kërkesat, sugjerimet e tyre për qështje të caktuara.

Komiteti regjional teknik

Organizuar nga Autoriteti për Gjeodezi dhe Kadastër i Republikës së Malit të Zi, me 30 Mars 2010 në Podgoricë u mbajt takimi i parë i Komitetit të përhershëm teknik ku morën pjesë përfaqësues nga të gjitha Autoritetet shtetërore për Gjeodezi dhe Kadastër në nivel të rajonit. Themelimi i këtij Komiteti ka për qëllim thellimin e bashkëpunimit profesional nga fusha e Kadastrit midis Autoriteteve për Gjeodezi dhe Kadastër të Bosnjës dhe Hercegovinës, Kosovës, Kroacisë, Malit të Zi, Maqedonisë, Serbisë dhe Sllovenisë.
Ndërsa Agjencia Kadastrale e Kosovës u përfaqësua nga Udhëheqësi  i Zyrës për Koordinim të Projekteve z. Muzafer Caka.

Nënshkruhet Marrëveshja e Bashkëpunimit mes  AKK-së dhe Departamentit Ekzekutiv të Policisë së EULEX-it

Agjencia Kadastrale e Kosovës  ka nënshkruar një marrëveshje  bashkëpunimi me Departamentin Ekzekutiv të Policisë së EULEX-it për shkëmbim informacioni.
Qëllimi i kësaj Marrëveshje është që të shtohet bashkëpunimi dhe koordinimi në lidhje me shkëmbimin e informatave lidhur me hetimin dhe zbulimin e pastrimit të parave, korrupcionit, krimit ekonomik, krimit të organizuar, terrorizmit dhe krimeve tjera të rënda.
Kjo marrëveshje themelon procedurat, kushtet dhe kriteret  për lehtësimin e shkëmbimit te informatave ndërmjet DEP EULEX dhe Agjencisë Kadastrale të Kosovës.

Video-konferencë - Regjistrimi i Pronës si Biznes

Agjencia Kadastrale e Kosovës më 18 Mars ishte pjesëmarrëse  në  video-konferncën e organizuar nga Banka Botërore për vendet ECA (European and Central Asia).
Qëllimi i kësaj videokonferencës ishte t’i ndihmojë agjencive në ngritjen e kapaciteteve  për kadastër nga vendet e ECA për  regjistrimin e paluajtshmërive dhe modelet e vetëfinancimit të këtyre agjencive.
Pjesëmarrës ishin përfaqësues nga vendet e rajonit dhe Azisë Qëndrore si dhe ekspertë të njohur botëror që i përkasin kësaj lëmie.
Në këtë video-konferencë u prezentuan këto punime:
                       
 -Menaxhimi dhe Regjistrimi i Pronës - John Manthorpe nga Anglia 
 -Menaxhimi dhe Administrimi i Tokës si Biznes -Të bësh biznes në Holandë  – Rik Wouters nga Holanda
 -Menaxhimi dhe Administrimi i Tokës si Biznes - David Egiasvili nga Gjeorgjia   

Unifikimi i kadastrit si bazament për të dhëna hapsinore

Agjencia Kadastrale e Kosovës sipas Planit të Punës 2010 ka krijuar  grupe punuese për çdo komponentë me qëllim që të kryejnë punët e nevojshme në arritjen e objektivave dhe rezultateve të pritura në përputhshmëri me këtë plan.
Plani i Punës përfshinë njëzetë (20) nën-komponente të cilat dalin nga gjashtë(6) komponente kryesore të Planit të Veprimit(2009-2011), ku 44 % e stafit punues të AKK- së do të jetë në dispozicion në Implementimin e Planit të Punës 2010. Grupet punuese  mbështeten nga kontraktor dhe konsulent vendor e ndërkombëtar, dhe  udhëhiqen nga drejtorët e njësive përkatëse ose nga persona të caktuar, siç është përcaktuar në Planin e Punës 2010.
-Shqyrtimi /mbështetja ligjore
Rezultati: Një komplet gjithëpërfshirës i Ligjeve mbi Pronën,Urdhëresa dhe Udhëzues për të mbështetur regjistrimin e kadastrit dhe të të drejtave të pronës si dhe një treg i tokave dhe i pronës me funksion të mirë.
Aktivitetet: Siguron  ndihmë  përbrenda AKK-së për çështjet ligjore dhe  për diskutime me institucionet e tjera lidhur me të kuptuarit dhe zgjidhjen e problemeve të përbashkëta.

Koktel në Agjencinë Kadastrale të Kosovës

Në Agjencinë Kadastrale të Kosovës u mbajtë një koktel rasti si shenjë mirënjohje me rastin e përfundimit të misionit të konsulentit profesional  Bengt Andersson.
Kryeshefi Ekzekutiv z. Hamit Basholli në hapje të këtij  kokteli  falenderoi z. Andersson  dhe shkurtimisht bëri një përmbledhje të punës dhe kontributit të cilin e ka dhënë z. Bengt Andersson për Agjencinë Kadastrale të Kosovës.
z.Andersson njihet për kontributin e tij  dhënë AKK-se si udhëheqës i saj që nga themelimi gjatë periudhës 2000-2003
Z. Bengt Andersson me punën e tij ka ndihmuar në hartimin e Planit të Biznesit 2009-2014 dhe Strategjisë Zhvillimore 2009 -2011 dokumente këto të aprovuara nga Qeveria e Kosovës.

Konsulenti në fjalë ka mbështetur AKK-në në shumë fusha si:
    
      - dokumentim transparent të vendim-marrjes,
      - mbështetje për top menaxhmentin e AKK-së në komunikim të politikave dhe   argumentim,
      - mbështetje në formimin e Komitetit Ndërministror për Administrimin e Tokës,
      - mbështetje në përpilimin e Planit të Veprimit 2009-2011 dhe Planit të Punës 2010 etj.

Implementimi  i Planit të Punës 2010 dhe Formimi i grupeve

Sot më 01.03.2010 në Agjencinë Kadastrale të Kosovës u mbajt  takimi njoftues  për  formimin e grupeve punuese  për Implementimin e Planit të Punës 2010.
 Sipas Planit të Punës  fillimisht kanë filluar punën këto grupe:

1. Shqyrtimi / mbështetja ligjore,
2. Avancimi i sistemeve teknike të TI   në Agjencinë Kadastrale të Kosovës,
3. Zhvillimi i strategjisë së SIKTK – së dhe
4. Shqyrtimi dhe zhvillimi i konceptit grafikë të SIKTK.

Fushata për Informim Publik

Me qëllim të vetdijësimit dhe informimit të qytetarëve  për rëndësinë e kadastrit  në Kosovë, sot më 22.02.2010 në Agjencinë Kadastrale të Kosovës  u mbajt një takim njoftues në mes të përfaqësuesve të Kompanisë për Informim Publik (Kick-off Conference) dhe përfaqësuesve të AKK-së të udhëhequr nga Kryeshefi Ekzekutiv  z. Hamit Basholli.
Qëllimi i këtij takimi ishte njoftimi me punën të cilën do të kryej kjo kompani dhe njëkohësisht  njoftimi  me  zhvillimet   në Agjencinë  Kadastrale të Kosovës.

Ky projekt do të zgjatë një vit dhe rezultatet që priten të arrihen nga kjo fushatë janë:

• përmirësimi i kapaciteteve në Agjencinë Kadastrale të Kosovës dhe në ZKK sa i përket komunikimit të brendshëm dhe të jashtëm;
• përmirësimi i nivelit të ofrimit të shërbimeve nga autoritetet kadastrale;
• rritja e angazhimit  nga pronarët e pronave në aktivitetet e vazhdueshme të regjistrimit;
• përmirësimi i imazhit për regjistrime dhe njohja e  rëndësisë së saj  për zhvillimin socio - ekonomik të Kosovës.

Projekti RECAP i Agjencisë Kadastrale të Kosovës aprovohet nga Banka Botërore 

Më 4 Shkurt 2010 nga Bordi i Bankës Botërore u aprovua projekti për regjistrimin e pronës së paluajtshme në Republikën e Kosovës (RECAP). Ky projekt i cili njëherit është një nga kreditë e para që i aprovohet Republikës së Kosovës kap vlerën prej 12.25 milion dollarë, ku 6.74 milion dollarë është kredi me zero interes dhe 5.5 milion dollarë është donacion. Projekti i përgatitur në bashkëpunim mes Agjencisë Kadastrale të Kosovës dhe BB, është në harmoni të plotë me Strategjinë afat shkurtër 2009-2011, si dhe planin e biznesit 2009-2014 për Agjencinë Kadastrale të Kosovës dhe zhvillimin e Kadastrit në Kosovë, të cilat janë aprovuar nga Qeveria e Republikës së Kosovës në muajin qershor të vitit 2009.
Si pjesë e Strategjisë së Agjencisë Kadastrale të Kosovës, ky projekt do të ndihmon zhvillimin e sistemit të informacioneve Kadastrale, dhe Administrimit të tokës në vend, si parakusht për të pasur një treg të qëndrueshëm të pronave të paluajtshme,  i cili ndikon drejtpërsëdrejti në një zhvillim të qëndrueshëm ekonomik dhe krijon kushte për një jetë më të mirë për qytetarët e Republikës së Kosovës
Projekti do të implementohet në periudhën e ardhshme 5 vjeçare në harmoni të plotë me Planin e Biznesit 2009-2014, dhe përbëhet nga tri komponentë:

• Administrimi i tokës në Komuna – Ri-inzhinjerimi i Zyreve Kadastrale Komunale, paisja me inventar dhe mjete pune. Regjistrimi sistematik i ndërtesave dhe banesave si dhe rindërtimi i informacioneve kadastrale për 80 Zona Kadastrale në pjesët më aktive të zhvillimit të Komunave;
• Korniza Institucionale e Agjencisë Kadastrale të Kosovës- Përkrahje e AKK-së në plotësimin e kornizës ligjore, rregulloreve dhe kornizave të punës. Themelimi i rrjetit permanent referent për GPS – KOPOS;
• Menaxhimi i projektit, trajnimet dhe Informimi publik – Zyra për Koordinimin e Projekteve, implementimi i planit gjithëpërfshirës të trajnimit për gjithë akterët e involvuar në tregun e pronave në Kosovë. Fushata e informimit publik për rolin e Kadastrit dhe regjistrimit të pronës si dhe anketime të ndryshme me qytetarë.

Strategjia e AKK për NSDI (Infrastruktura shtetërore e të dhënave hapsinore) në përputhshmëri me projektin e Komisionit Evropian (EC)
për vendet e rajonit

Me iniciativë të Autoritetit shtetëror për Gjeodezi të Republikës së Kroacisë, dhe në koordinim me të gjitha Agjencitë Shtetërore për Kadastër në rajon, është aplikuar në Komisionin Europian (EC) me projektin e përbashkët rajonal për Infrastrukturën e të dhënave hapësinore (SDI). Projekti i titulluar “INSPIRATION – SDI in Western Balkans” ka për qëllim ngritjen e vetëdijes, kapaciteteve dhe legjislacionin për zhvillimin e Infrastrukturës Shtetërore për të dhëna hapësinore (SDI) konform direktivës së Bashkimit Europian INSPIRE. Nëpërmjet Agjencive Shtetërore për Kadastër në këtë projekt të përbashkët marrin pjesë shtetet e rajonit: Shqipëria, Bosnja dhe Hercegovina, Kroacia, Kosova, Maqedonia, Mali i zi dhe Serbia.
Për të finalizuar këtë projekt propozim, Komisioni Evropian (EC) organizoi një workshop në Bruksel nga 19-20 Janar 2010, ku morën pjesë gjitha Agjencitë Shtetërore për Kadastër nga shtetet e rajonit. Agjencia Kadastrale e Kosovës në këtë punëtori u përfaqësua nga z. Muzafer Çaka-Udhëheqës i Zyres për Koordinimin e projekteve.